الرئيسية » الغاز شعبية » الغاز مغربية شعبية قديمة وحجايات حديدان مع الحل
الغاز مغربية و حجايات حديدان
الغاز مغربية

الغاز مغربية شعبية قديمة وحجايات حديدان مع الحل

* نقدم لكم في هذه المقالة الغاز و حجايات مغربية شعبية قديمة والتي تبدأ بالعبارة المعروفة “حاجيتك ماجيتك“، وكذا قدمنا لكم مجموعة من الألغاز المغربية السهلة و المُقدمة للأطفال و منها أيضا المضحكة.

– حاول أن تفك الفوازير لوحدك قبل الاطلاع على الحلول، ستساعدك هذه الطريقة في التعرف على نسبة ذكائك و مدى فطنتك وخفة عقلك في حل الألغاز بمفردك.

 

1- حجايات حديدان مكتوبة بالدّارجة:

 

* إليكم مجموعة رائعة من الحجايات الشعبية للشخصية الأسطورية للحكايات و الألغاز الشعبية المغربية والمعروفة بـ الغاز حديدان

– حاجيتك ماجيتك على حرف الحاء بن الحاء بدمو ولد النّبي فدا ورقبتو للسكين مدّها، الحاء ولد الحاء لبسلّها مول الجلابة قبل ما يولّي طعما ولا سدا، الحاء ولد الحاء منو فراش منو كسى منو غطى منو لينا غدا، قالو عليه ناس زمان هو نعمة نشكرو عليها مولانا زين المعطى ؟

الاجابة

الاجابة

الحولي




– حاجيتك ماجيتك على حرف اللّام بن اللام وباللام كيبدا الكلام سوا فرد ولا بالتوام، هوما عمارة الدار، حميّا ومنهم حزام وسمار، قلّتهم تبرد الكتاف وكثرتهم الطّلع الزّعاف، في صغرهم فيران، برغاهم يونّسو وفي شبابهم ثيران، بهمّهم يهوّصو وفي كبرهم كيوليو جيران كُلا وعشّو ؟

الاجابة

الاجابة

الأولاد

– حاجيتكم على عين عوينة عين والصقع اللي جا بيناتهم صهدو صهدين ومكوي بنارين، عين ولداتك وفي صغرك كانت عوينك وعين عجباتك وكمّلتي بيها دينك ؟

الاجابة

الاجابة

العروسة و العجوزة

– الطاء ولد الطاء منو القاع و الغطى يجمع القفة مخلطا ويبغي الخضرا مقرّطا القزبر قبطا والمعدنوس ربطا، الحق يتڨال لا كان غير الطا ولد الطا زين البنّى ومنظر فالحطّى، أيا قولو ليا واش هو ؟

الاجابة

الاجابة

الطيفور

– حاجيتك ماجيتك على الحا ابن الحا عينيه كحلى محرّفة يهز الثقل على ظهرو ويدوّر المعصرى والرّحى، عاطي ظهرو لتمارا، دمّار حامي راسو، يسمع المعيور وصبّار، يُوصفوه بالمكلخ و هو بلا ڨواد يوصلك للدّار، يمشي فالعقبة والوطى ويرد بالو من الحافة ويخمم قبل ما يوطى، حرّاث إلا جيتي للعناد هو مولاها وإلا جيتي للطاعة ما تلقى وحلا معاه ؟   

الاجابة

الاجابة

الحمار

حجيات مغربية مضحكة مع حلولها

– مبدي بحرف البا والبا بنت البا جلايلها هوما كساتها ولباسها، وجدورها كُفّاية فوق راسها، الباء بنت الباء ملّي تعريها من لباسها أتبكيك بلا سبّا وإلا رخاسيتي عند الناس يشبهوك بيها و يقولو ما تسواش البا بنت البا ؟

الاجابة

الاجابة

البصلة

– حاجيتكم على الحاء بنت الحاء كيقولو غرستها من الجنة جات، في الأعياد كيرشمو بيها الصبيان ويزوّقو بيها البنات، الحاء بنت الحاء كتحضر في الأعراس والمناسبات والتّاجر في الأحزان والجنازات، الحا بنت الحا عند العطّار خضرا و فالكفوف حمرا والقلب الزّين كيعطيها النظرة ؟

الاجابة

الاجابة

الحنة




– حاجيتك يا حديدان على الشين بنت الشين كتقلع الدسارا وتعمّر الشكارا  وتخليك أوس في القصور تتسارا، الشين بنت الشين مُولاها قالو يتعشّى مرتين عند بالو شامت وهو مشموت مسيكين ؟

الاجابة

الاجابة

الشّطارة

– حجيتك يا لالّة و ماجيتك على الشين بنت الشين شايبة ومعرّقة، فالشتا حاضرا و فالصيف غايبا، ريحتها من بعيد دربك وتعرفها فالدار كاينة، تبهّج الكاس وتشد الراس وتسخن العظام و فايدتها باينة ؟

الاجابة

الاجابة

الشيبة

– الشين بنت الشين لابسا لبيض تقول على الراجل حازنا ودموعها حتى لقدامها نازلا، الشين بنت الشين نارها فوق راسها كيف لعلام، تلحّق تموت و تضوي في الظلام ؟

الاجابة

الاجابة

الشمعة

حجايات مغربية

– حاجيتك ماجيتك على الرا ولد الرا عطاه ربي الحق على المرا و داروليها غطا لراسها ونقرة فاش يغبر نحاسها، الراء ولد الراء يعلا شانو تاا يعلا و تلقى وراه مرا ؟

الاجابة

الاجابة

الراجل

– الغين ولد الغين علّم الحكمة للبشر أجمعين وقرّى ولاد بونا آدام قابيل وهابيل باللّي سر الميت الدفين، الغين بن الغين يقولو عليه منحوس وهو غير غين ولد الغين ما يجبد عار ما يضرب بعين غير متهوم مسكين ؟

الاجابة

الاجابة

الغراب

– حاجيناكم على الزين ولد الزين كلمة بشانها وعزّها يبدا بهدرا وكلام ويكمل بزغاريت وتزمام، كلمة بدات مع أمنا حواء وبونا آدام ووصّانا عليه نبينا عليه الصلاة والسلام باش نشهّرو بيه ونهزّو ليه لعلام ؟

الاجابة

الاجابة

الزّواج

– مكنية بحرف التا والتا بنت التا فالشجرة نابتة كون ما أمنا حوا كَلاتها ما تعرف الدنيا ولا تشم ريحتها لا هيّا ولا ترّيكتها، ما هيّاش دواء وكتحمي من الداء ؟

الاجابة

الاجابة

التفاحة

– مبدي بحرف النون والنون لنون قريب وأخا تكون بينك وبينو خصوما يبقا لولادك وأم ولادك حبيب، محسوب منك وآخا ماشي من دمك وغريب، النون ولد النون هو ليك حوش وزريبة وأنت ليه عزّ وهيبة ؟

الاجابة

الاجابة

النسيب

الغاز شعبية

– حاجيتك ماجيتك على الدال بن الدال قبة خضرا، أصلها ماء وتسقى بالماء، سكانها عبيد وسَوارتها حديد، ، الدال بن الدال تجنى ما تحصد وما تحتاج دريس ما مدوّرا ما طويلا ؟

الاجابة

الاجابة

الدّلاع

– الطا منو ربي خلق الجبال و الوطى، أحنا منّو وهو منّا واللّي يتكبر وما يرضاش عليه يوطى، وكيقولو هو أولّنا ومنو ربي خلقنا وآخرنا نرجعو للطا ولد الطا ؟

الاجابة

الاجابة

الطين

– حاجيناكم ماجيناكم على حرف الحاء بن الحاء دقّتو واعرة كتقتل، ما يدير حسّ ما عندو خير وشرّابتو طويلة وضّاحة، الحاء بن الحاء كيهبش وينبش و ما عندو ظفار كيسكن في الغار وماشي فار وكيدخل للدّار بلا راي بلا شوار، الحا بن الحا كيبيّض ما يولد وكي يفقس ما كيخرجش الفلالس. ودابا قولو ليا واش ؟

الاجابة

الاجابة

الحنش

– الحاء بنت الحاء يقولو من ضَلعت بونا أدام خرجات وأول وحدة بإبليس تغوات، حتى من شجرة التفاح كلات وكانت ليها سباب باش من الجنة خرجات وهي و بونا أدام للأرض نزلات ومن ديك الوقت والرجال حاسبينها هي سباب كل الزّلات وهي بحكم الله رضات ؟

الاجابة

الاجابة

حواء

– حاجيتك ماجيتك على حرف الكاف يرد الهيبة ويحضي الغيبة يحرس الزّريبة ويرعى الكسيبة، فالعشرة ولّاف ما يدوزكش وآخا تكون الحمية بزّاف، بالحق إلا جاه الجوع أمفلس وصاب السيبا، يخلع الدجيجات والفلالس تقول مرضعاه ذيبة ؟

الاجابة

الاجابة

الكلب

حجايات حديدان

– حاجيتك ماجيتك على النون بنت النون حاكماهم أنثى وخادمها سلطان قصرهم شمع محصن كُلّو شراجم وبيبان مذكورين في كتب الطب وحتى فالقرآن ، لسعتهم دواء وفي جوفهم كنز ماليه تمام ، قُوتْهم قليل وجودهم كثير حجمهم صغير وشانهم كبير في بطونهم حاملين سر من أسرار الكون ؟

الاجابة

الاجابة

النحل

– مبدي بحرف الفا والفا بن الفا كلشي فيه، الشكران فيه و الذمّان فيه، منورو كلام الله اللّي فسّرو ومخليه على فطنة ونبيه، بالحق إلا غرّو الغرار ولعب بيه كيخلّيه يسعى للنّار برجليه، نقولو الله يرحم من قرّاه، الخير معاه وعلى يدّيه يعلّمنا العبادا ويلقّم لينا الشّهادا يضبط الكفن ويغسّل الميت ويقرى عليه ؟

الاجابة

الاجابة

الفقيه

– الجيم بالجيم كون يعطيوك الخيار تختارو هو قبل الدار، كان جديد ولّى قديم، لازم كتسول فيه وتحيّي معاه صلة الرحم، ما تجيب عليه دسارا ما تجبد معاه عيب ولّا عار وهاد الجيم ولد الجيم وصّاو عليه وقالوا الجيم قبل الدّار ؟

الاجابة

الاجابة

الجار

– حاجيتكم أسيدي على القاف و القاف كيغلاض بلا طعام ويرقاق بلا صيام، مرة مدور بحال وجه الباهية و مرة رقيق كيف التبسيمة ومرة مغُوبش بلا تقليقة ؟

الاجابة

الاجابة

القمر

– حاجيتك آسيدي و ماجيتك على اللي هو عبدك وتحت رجليك غير حداك وفي جنابك في العصرية لاصقك وعمرو ما يهرب عليك، هو اللي يقطع الواد وما يسرد، و يدوز في العافية ما يتحرق ما يصهد ؟

الاجابة

الاجابة

الظل

– مكنية بالصاد وعليها يتلايمو العباد حاكمها سلطان ولادو صبيان يخافو لا يكْويهم من جوفو بالنّار، مقابلها ساقي يزوّج ويلاقي والهدرا دايرا عالملّقى والفراق والبيع والشراء والزواج والطلاق، ما هيّا ميدة المخزن ولا دار القاضي عياض

الاجابة

الاجابة

الصينية

 

  • الغاز حديدان بالفيديو :

 

 

2- الغاز حاجيتك ماجيتك مغربية صعبة مع حلولها:

 

– حاجيتك ماجيتك على المبدي بحرف التاء والتاء حاجة المريض، أسهالت الفريضة بيها، حضورها ما يخليك في حاجة للما والما ما فيها ؟

الحل

الحل

التيمومة

– حاجيتك ماجيتك على الراء والراء فاكهة قشيرة مغطياهم جويهرات حمراء محلاهم طريفات رطبة حاجباهم، ڨاع خلايق الله تشهاهم ؟

الحل

الحل

الرمان

– من السماء نزّلني الرّب العالي، كننزل في الشتوا وفي عز الليالي، عمّرت ويدان وغدّيت عيون في الجبال العالية، كنكون ولد الما ويقتلني الما و محلاني في الشّريبة ديال الما ؟

الحل

الحل

الثلج

– مبدي بحرف الواو، ولواو الله يكفيكم من باسو، تاجو ربي يعذب بيه اللي ما طاعو، الناس تهرب من بلاه وهو حاملو فوق راسو ؟

الحل

الحل

وقيدة

الغاز مغربية مع الحل

– حاجيتك يا ولد الحرة على اللي دخل توضّى وخرج صلّى من ثما ما ولّى ؟

الحل

الحل

الميت

– هوالي هوال ونغلب الصحيح  فالغوال ونهز من لخشب أرز وعرعار و منقدرش نهز غرام ديال المسمار ؟

الحل

الحل

بحر

– كسبني نوح في أيامو نجّا بيا قومو ونعامو، حاملة ومحمولة و يابسة ومبلولة الماء طريقي و الريح صديقي ؟

الحل

الحل

السفينة

– هوالي هوال ونغلب الصحيح  فالغوال ونهز من لخشب أرز وعرعار و منقدرش نهز غرام ديال المسمار ؟

الحل

الحل

بحر

حاجيتك ماجيتك

– راه راه والغوت وراه، الحياء ما فيهش وهاز اللي ما ليهش ؟

الحل

الحل

شفار ( السارق )

– حاجيتكم ماجيتكم على الكاف و الكاف لقيمة فوق عويد مذكورة في كتابو تعالى وحلاوتها في الفم ما تسالي

الحل

الحل

الكرموس

– جويهرات مرصوصين فبزتامهم مخشوشين بهاَ، ضحكتهم الطَيّر النوم من لعين ؟

الحل

الحل

سنان

– بغلافي وماني سرير، بأوراقي وماني شجرة، جبت أخبار وعلم القدام، أنا غذاء للعقل وكنتكال بلا فم ؟

الحل

الحل

الكتاب

– نلاقي جوج في الحلال يلبسوني نساء ورجال، ذهب ولا نقرة موروث وعادة من هادي أجيال ؟

الحل

الحل

خاتم

الغاز مغربية وحلولها للاطفال

– فضة ما هواشي غدّار و لحديد يرشّي بلا بيه لحياة ما تسوى شي ؟

الحل

الحل

الماء

– مبدي بحرف الحاء وهاد الحاء على دارنا مزلقا ناسها مقلقا وحيوطها مغلقا، الخارج منها كيشعل بالنقا ؟

الحل

الحل

الحمام

– لوني لون الصفاوا بيا تطفا لعداوا، أنا والتمر خاوا ومعايا الدري الصغير يكبر ويداوا ؟

الحل

الحل

الحليب

الغاز حديدان

– تحت لرض ربي عالم بيه كريم ويسقي لي طلب ليه، يوسف خوتو لاحُوه فيه وربي عطا شلّا آيات عليه ؟

الحل

الحل

البئر

– لونها أخضر غَاية ولابسة ميات صاية وصاية ؟

الحل

الحل

الخس

– قالو عليها ناس زمان لابسة ألف عباية ورجليها من تحت عرايا من الريش دايرة سلهام ديما حاضنة بالسُّكات وبالكلام ؟

الحل

الحل

الدجاجة

 

  • الغاز مغربية بالفيديو  :

 

 

3- الغاز مغربية مضحكة مع حلولها:

 

– شنهيا الحاجة اللي تاكلها في رمضان وما كتفطركش ؟

الحل

الحل

العصا

– حاجة فيها الرّاس ومفيهاش العينين فيها اليدين ومفيهاش الرجلين. شنهيا ؟

الحل

الحل

الجلّابة

– واحد السيد مريح في البيت يقرى في الجرنان دخلت عليه بنتو طفات عليه الضو. باش غادي يضربها ؟

الحل

الحل

يضربها بنعسة

– كنت واحد النهار صايم دنات المغرب وأدن المؤدن الله أكبر و الميدة عامرة فطورك. شنوا تسبق الأول ؟

الحل

الحل

بسم الله

– شناهيا الوقيّة اللي أنت تكون فالدار بلا راس، أنت كاين والرّاس ماكينش ؟

الحل

الحل

الوقت اللي تكون الطل من التاقة الراس على برا و الرجلين لداخل

 

4- الغاز مغربية وحلولها للاطفال:

 

– واحد الشيء كناكلو منو وما كناكلوهش ؟

الاجابة

الاجابة

الصحن

– حاجة كنلُومُوها إذا تعطْلات وكنعاتبوها إذا زربات وكنتقلقو عليها إلا وقفات ؟

الاجابة

الاجابة

الساعة

– هادي وحدة الناس بزّاف كيبغوها واللّي جات لعندو كيبقى يركل فيها ؟

الاجابة

الاجابة

الكرة 

– واحد الشيء ظهرو عود و بطنو جلد و الفم ديالو كيأجج بنار جهنم ؟

الاجابة

الاجابة

الرابوز

 

5- حجايات مغربية سهلة:

 

– شيء في الشّباب ديالو يكون أسود وكي يموت يولّي أبيض ؟

الحل

الحل

الفحم ( الفاخر )

– ثلاثة ديال الخواتات ديما واقفات وإلا جراو ديما كيجريو مع بعضياتهم ؟

الحل

الحل

الفرفارة ( الرياشة )

– واحد الحاجة كناكلو منها وماكناكلوهاش ؟

الحل

الحل

الشجرة

– كتكسونا بأغلى ما عندها من الأثواب وهي مسكينة عريانة بلا لباس و جلدها جلد الحرير شكون هيا ؟

الحل

الحل

دودة القز

– حنا جوج خوت شهادة لله كلشي شفناه بجوج أنا ماريت خويا وهو ما راني ؟

الحل

الحل

العينين

 

– إلى هنا نصل إلى نهاية المقالة والتي تطرقنا فيها إلى اللغز الشعبي المغربي والذي يرجع بك إلى قديم الزمان أين عاش آبائنا وأجدادنا بعيدا عن ضوضاء الإعلام وإدمان التكنولوجيا وضجر الحياة الافتراضية الموجودة على الانترنت في أجواء نقية وهادئة. للمزيد من الألغاز الشعبية إليك هذا الكتاب . أترك تعليق أسفل الصفحة تخبرنا فيه كم من لغز استطعت أن تفك لوحدك قبل الاطلاع على الإجابات .

شاهد أيضاً

صور الغاز

صور الغاز جديدة مع الحلول و الغاز بالصور للأذكياء مع الأجوبة

صور الغاز جديدة مع الحلول للذين يملكون دقة الملاحظة، قدمنا لكم الغاز بالصور لكل من يريد فك …

4 تعليقات

  1. سمير العصفور

    الله يعطيكم الصحة الغاز في منتهى الروعة تدكرنا بأيام زمان يا سلام برافو برافو برافو

    • شكرا لك تعليقك يحفزنا للعمل أكثر و البحث عن المزيد من الالغاز و الحجايات السعبية القديمة

  2. الغاز مغربية تذكرنا بايام زمان

  3. الغاز ايام زمان من وقت 1980

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *